ORANJESTAD (AAN) – Tur hende mester conoce e derechonan y responsabilidad di pashent di manera cu por sigura cu cada persona lo tin un bon calidad den cuido di nan salud.
Un pashent tin derecho di conoce informacion importante pa su salud, haya servicio di emergencia ora mester, scoge libremente su dokter, botica, dentista, laboratorio etc.
E derechonan di un pashent ta inclui cu e mester wordo trata igual cu tur otro hende, esta cu respet. Bo derechonan tambe ta inclui privacidad di e informacion relaciona cu bo salud y un revision lihe y oportuno di bo kehonan.
Pero tambe tin responsabilidad nan cu bo persona mester cumpli como pashent, manera yuda controla bo salud y bienestar, esaki ta inclui hiba un bida saludabel, haci ehercicio, no huma, come di manera balansa pa baha e factornan di risico cu ta afecta bo salud. Bo mester compronde y sigui e instruccion nan cu bo dokter ta duna bo, esta bebe e remedinan manera indica y no tuma remedinan cu no ta wordo receta pa bo dokter pasobra en bes di yuda esaki lo trece mas problema pa bo salud.
Ban splica un poco mas tocante bo derechonan:
Ora nos ta papia cu un pashent tin derecho di scoge libremente e compania cu ta bay duna e servicio (botica, laboratorio, dentista etc) kier men cu e persona tin e derecho y e libertad di haci esey, ni un hende por impone otro. Mes cos cu bo ta scoge e botica sea pa e servicio cu bo persona ta haya, sea pasobra e ta keda mas cerca di cas, o pa cualke otro motibo, asina mes e persona por scoge na cua laboratorio por bay pa tuma sanger.
E dokter of e assistent di e dokter no por impone esey pa ningun hende. Si bo persona ta sinti confortabel cu e servicio cu bo laboratorio of botica ta duna, sea pasobra nan ta tuma sanger bon, sea pasobra bo no mester warda hopi, of cualke otro rason, e criterio di bo persona ta conta, esey ta bo derecho na liber scohemento.
MEDLAB, ta e unico laboratorio certifica ISO 15189 y acredita ISO 9001 na Aruba, ta tuma cuenta di cada un di e aspectonan di bo derechonan como pashent. Pa cuminsa den e Politica di Calidad cu ta manera e bijbel di un organisacion, ta para bon cla e compromiso di e laboratorio pa proteha e salud di e pashent dor di reduci e risico di infeccion asocia cu cuido di salud. Duna resultadonan oportuno y confiabel, dor di aplicacion di Standard Internacional.
Kico ta nifica resultadonan oportuno y confiabel?
Oportuno kiermen e tempo di entrega di cada resultado cerca e dokter. Laboratorio MEDLAB ta conecta cu e sistema Promedico di tur dokter di cas dus, tur e resultado nan ta drenta na e computer nan di dokter di cas e mesun dia atardi. Esey kiermen un resultado oportuno.
Confiabel kier men cu prome cu un resultado di sanger ta ser entrega henter un proceso hopi intensivo di control di calidad interno y externo ta tuma luga.
Ta bon pa hende sa cu ora un organisacion ta traha cu standard internacional tur cos ta wordo teni na cuenta y cada un di e actividad nan di dunamento di servicio ta wordo controla. Si tin algo cu ta sali for di locual a ser estableci, medidanan urgente ta ser tuma pa drecha e situacion. Pa pone un ehempel chikito, na Laboratorio MEDLAB tin como regel cu un pashent no por warda mas cu 15 minuut pa wordo atendi, si ta presenta e caso cu e rij pa warda ta hopi largo, nan ta pone otro hende prik pa atende e persona dentro di e 15 minuut estableci.
Por ehempel, si un persona tin un keho pa cualke motibo, na Laboratorio MEDLAB ta duna siguimento na e keho, esta busca e causa pa cual e situacion a presenta y aplica midi nan di coreccion pa no bolbe presenta, papia cu e pashent y splica loke por a sosode te ora e pashent ta compronde y ta keda satisfecho cu lo cual a ser splica. Esaki ta un pilar importante di un organisacion Certifica y Acredita, esta e satisfaccion di e pashent. Corda semper cu bo persona tin derecho na un revision cuidadoso, husto, lihe di bo keho.
Otro compromiso di Laboratorio MEDLAB cu ta bal la pena menciona, ta cu su empleadonan mester sigui un plan di studio pa aña, cual ta ser diseña di acuerdo na loke cada hende tin mester, esaki ta sigura cu tur personal cu ta traha na Laboratorio MEDLAB ta keda constante up to date cu tur avance nan di ciencia y cuido di salud.
Un otro aspecto hopi importante ta cu na Laboratorio MEDLAB ta evita cualke forma di discriminacion esta tur persona ta wordo trata mescos sin importa e rasa, religion, idioma., incapacidad , inclinacion sexual y status economico.
Ta bon pa bo persona para un rato y pensa cu si un organisacion tin na cuenta tur e aspectonan aki y hopi otro mas, pa garantisa un bon servicio di salud, pakico laga otro hende obliga bo bay na un otro luga cu no ta garantisa tur esey?
Ta berdad cu e responsabilidad grandi riba nos salud ta cay riba cada un di nos, pero tambe ta berdad cu bo persona tin derecho di scoge e laboratorio y botica cu ta duna bo miho servicio y ta garantisa un bon servicio y un resultado confiable.
“Bo Salud ta Merece E Miho”