‘Den coordinacion cu Departamento di Salud Publico (DVG)’
Medlab Aruba a conta cu bishita oficial di representante di Caribbean Public Health Agency (CARPHA) na laboratorio principal situa na ImSan. Como un agencia regional di salud publico pa Caribe, CARPHA ta carga e mision pa fortifica capacidad di su miembronan den e sector di salud publico, seguridad di laboratorio, y control di malesa. Den coordinacion cu Departamento di Salud Publico (DVG), CARPHA ta na Aruba pa reuni cu diferente socio local den e sector di laboratorio clinico.
Como parti di e bishita, a cumpli cu un reunion fructifero entre representante di CARPHA Dr. SueMin Nathaniel, representante di DVG Anselmo Mathew, hunto cu representante di Medlab Aruba, esta Director di Laboratorio Dr. Carlos Yagua Velasquez, Director di Operacion Ana Maria Verschuur, y Director di Calidad Anny Janssen.
E bishita aki ta un testament di e rol importante cu Medlab Aruba ta fungi na e sector di salud publico y priva di Aruba. Un laboratorio cu ta enfoca riba seguridad, inovacion, y calidad riba nivel. Cu evaluacion y guia, CARPHA ta yuda na alinea Aruba cu paisnan den e region, asegurando cu nos isla ta keda prepara pa retonan global y local segun capacidad y standard di laboratorio clinico den e sector di salud.
Un gradicimento ta bay na DVG, CARPHA, y ekipo di Laboratorio Medlab pa disposicion y cooperacion durante e bishita.
Tocante Laboratorio Medlab
Desde 1991, Laboratorio Medlab ta lider den innovacion den laboratorio diagnostico na Aruba, ofreciendo investigacion di laboratorio di calidad halto cu presicion y cuido. Cu acreditacion ISO 15189:2022 desde 2008, Laboratorio Medlab ta sirbi e pashent di AZV, pashent priva, companianan local y profesionalnan den cuido medico cu un gama completo di test rutinario y avansa.
Cu diferente ubicacion strategicamente situa rond di nos isla, y cu disponibilidad 24/7, e laboratorio ta sigura cu e servicio ta keda semper uno accesibel. Ta di menciona cu e laboratorio ta ofrece servicio di tuma muestra directamente na cas “Thuisprikken” na pashentanan cu pa un motibo of otro no por bishita un di nos ubicacionan. Asina ta keda percura na provee servicio di calidad halto di laboratorio cu ta facilita acceso den cuido di salud.
Laboratorio Medlab ta wordo reconoci pa e conocemento y experencia den metodologianan di test avansa, cual ta provee resultadonan preciso y di confiansa pa asina contribui y duna sosten na un miho cuido di salud na e comunidad.
